Tetum
English
Grupu rai-osan hakbiit feto sira atu lidera mudansa
Iha rejiaun iha Timor-Leste ne’ebé mak vulneravel ba dezastre, feto sira iha Bobonaro, Viqueque, no Oe-Cusse ne’ebé mak hetan suporta husi projetu Disaster READY (Dezastre PRONTU) uza didi’ak atividade sira husi grupu rai-osan hodi hatan ba dezafiu sira no mos kria reziliensia longu-prazu ba dezastre.
Iha parte remota iha munisipiu Viqueque, Joanina nia suku hasoru dezafiu ida ne'ebé ho durasaun naruk tamba laiha ponte ida no sistema mota ne'ebé la adekuadu. Mota Luca sai hanesan bee dalan ida, no mota ne’e nia bee sa’e bainhira udan boot, dalabarak hamosu estragus ba Joanina nia komunidade. Konsekuensia husi estragus sira klean tebes – labarik sira labele asesu dalan hodi to’o ba eskola, vendedor sira hetan difikuldade fan sira nia produtu iha merkadu, no membru komunidade sira iha movimentu ne’ebé limitadu tebes.
Joanina, inan reziliente ida ne'ebé iha relasaun di’ak ho nia komunidade, la bele simu haree terus ne'ebé mosu bebeik tamba falta ai-han ne'ebé kauza husi dezastre natural sira. Problema sira ne’e komesa muda bainhira projetu Disaster READY introdus Asosiasaun Grupu Rai no Empresta Osan, ne’ebé sai hanesan komponente importante ida ba projetu ne’e, ba Joanina nia komunidade. Inisiativa ida ne’e lori esperansa foun ida ba komunidade sira. Joanina aproveita oportunidade ida ne'e hodi hahú negósiu kios, la'os de’it atu suporta nia familia maibé kontribui ba komunidade nia moris-di'ak. Liu husi diversifikasaun atividade ekonomika no kria fonte rendimentu sustentavel ida, Joanina no membru grupu sira seluk iha grupu rai-osan iha ekipamentu di'ak liu atu hasoru impaktu sira husi dezastre natural sira.
“Ami agora iha asesu ba empresta osan ho funan ki’ik husi grupu rai-osan ne’e. Ida ne’e di’ak tebes no bele ajuda komunidade sira ho dalan oi-oin. Hau sente sorte tebes tamba bele asesu emprestimu hodi loke kios atu ajuda hau nia familia, ami iha mos fundu sosial ne’ebé mak ami nia grupu iha planu atu uza hodi suporta komunidade responde no rekupera husi inundasaun sira iha futuru. Fundu ida ne’e sei foka ba suporta hadi’ak infraestrutura, nesesidade moris, no agrikultura”, Joanina refleta.
Ponte foun ida agora halo dadaun ona iha Joanina nia komunidade. Ho ida, projetu Disaster READY fó treinu lider lokal sira konaba fahe mensajen avizu-sedu ba komunidade sira, atu nune’e sira bele prepara di’ak ba dezastre sira no mos buka fatin seguru hodi evakua. Planu ida ne'e iha ligasaun ho grupu rai-osan, asegura katak komunidade sira preparadu la'os de’it iha fíziku maibé mos iha oinsá sira bele responde ba dezafiu sira. Aprosimasaun proativu ida ne'e asegura katak komunidade sira bele prepara ba dezastre ne’ebé iha potensial atu mosu no evakua ba fatin seguru sira ho efisiénsia.
Rekoñese urjensia no importansia husi hasa’e reziliensia komunidade nian, Joanina iha komprimisiu boot atu estabelese grupu rai-osan ne'ebé lidera husi feto. Nia vizaun klaru tebes – katak grupu ne'e sei sai nudar fator importante ida hodi responde ba nesesidade membru komunidade sira ne'ebé vulneravel liu, liu-liu sira ne'ebé ho defisiénsia, ferik-katuas no labarik sira, liu-liu durante tempu krize. Joanina haree envolvimentu feto sira nian iha inisiativa sira hanesan ne'e la'os de'it importante maibé nesesáriu, no liu husi ninia esforsu sira, nia hakarak hatudu ezemplu husi impaktu signifikativu ne'ebé feto lori ba komunidade nia moris-di'ak no preparasaun ba dezastre.
“Tamba agora projetu Disaster READY suporta ona ami harii grupu rai-osan no treinu ona ami konaba redus risku husi dezastre, hau fiar katak buat hirak ne’e sei halo ami prepara di’ak liu tan ba futuru.”
Ita ba fali terenu ne'ebé difisil atu ba iha munisipiu Bobonaro, Martinha nia suku hasoru vulnerabilidade ba inundasaun no rai-halai husi fatin ne’ebé sira hela ba. Hale'u husi foho sira no lokaliza iha rai-naruk nia okos, ho Mota Obulo iha parte leste, Martinha nia komunidade nia fatin hatudu katak preparasaun ba dezastre no mitigasaun ba risku la'os de'it importante maibé bele salva duni sira nia moris.
“Udan boot signifika problema boot sei mosu mai ami. Fasilidade sira hanesan eskola, merkadu, no hospital iha kedas parte sorin liu iha suku ne’e, no bainhira tama ba tempu udan, difisil tebes ba ami atu asesu dalan boot tamba bee sa’e bebeik”, Martinha esplika.
Trauma ho konsekuensia sira ne’ebé mak bele mosu husi dezastre natural, nia ativamente fó hanoin ba komunidade sira atu kuidadu bainhira la’o iha dalan durante tempu udan.
Maske nia komunidade ladun iha oportunidade relasiona ho hasa’e kapasidade, Martinha iha dedikasaun boot tebes atu asegura katak nia komunidade hetan duni oportunidade. Nia nudar delegada ba Xefe Suku, no nia hatene konaba projetu Disaster READY primeiru bainhira nia partisipa iha enkontru ho autoridade lokal sira no nia mos halo advokasia hodi nune’e nia komunidade mos bele partisipa iha projetu ne’e.
Grupu rai-osan importante tebes ba Martinha nia komunidade, liu-liu iha eventu importante sira hanesan inan tuur-ahi. Membru komunidade sira kontribui ba fundus ne’ebé dedikadu atu uza ba transporte, no bainhira inan isin-rua presiza asesu ba sentru saúde, Martinha nia grupu rai-osan uza osan ne’ebé tau hamutuk ona atu uza ba aluga kareta. Prosesu ne'e envolve rejistu osan ho transparente, envolvimentu komunidade, no revizaun regular hodi asegura grupu uza fundus ho di’ak. Inisiativa ida ne'e la'os de'it fó asisténsia pratika maibé mos hatudu komunidade nia forsa koletiva hodi responde ba nesesidade espesífiku membru komunidade sira nian durante momentu krítiku sira hanesan inan sira partu.
“Uluk liu, bainhira feto sira iha komunidade atu tuur-ahi, ami hein ambulansia kleur tebes atu to’o ami nia fatin. Mane sira halo de’it kadeira ho rota hodi tutur inan isin-rua sira iha sira nia ulun hodi ba dalan boot no hein ambulansia iha ne’ebá. Agora, ami bele empresta osan ne’ebé ami rai ona iha grupu rai-osan hodi aluga transporte mai kedas ami nia suku, ida ne’e hodi bele ajuda lori inan isin-rua sira tuir tempu no la atraza”, Martinha refleta.
Hanesan parte ida husi intervensaun husi Projetu Disaster READY nian hodi prepara komunidade sira ba tempu udan ne'ebé naruk, projetu ne’e fahe fini modo ba Martinha nia grupu. Inisiativa ida ne'e partikularmente importante tebes, hodi tulun komunidade sira atu kuda modo oi-oin iha sira nia kintal no asesu ba kuu ai-han fasil bainhira udan estraga dalan. Grupu ne'e uza osan ne’ebé rai hamutuk hodi finansia atividade sira ne'ebé hamosu rendimentu, inklui sosa material ba soru tais no halo ai-manas ba fa'an iha merkadu lokal.
Martinha reforsa tan importansia husi atividade sira ne’e ba haforsa komunidade sira hodi sustenta moris, no nia dehan, “Hau kontente ho atividade sira ne’e iha ami nia komunidade; ami sente katak ami bele moris ho hakmatek ona. Komunidade sira ne’ebé mak besik ami mos hatete katak sira iha interese atu kria sira nia grupu rai-osan rasik, no ida ne’e di’ak tamba ema komesa haree ona impaktu pozitivu husi grupu sira hanesan ne’e. Bainhira komunidade ida sente preparadu atu hasoru dezastre, importante mos komunidade sira seluk mos sente hanesan ne’e.”
Hanesan mos ho Joanina no Martinha, iha komunidade furak ida iha Oe-Cusse, Rosina no nia feto maluk sira iha tempu naruk nia laran depende ona ba hakiak animal no kuda modo hodi sustenta sira nia familia. Bainhira mudansa klimatika no dezastre natural sira mosu bebeik, sira nia dalan atu sustenta moris sai ameasadu tebes.
“Ami hasoru difikuldade bainhira udan boot no inundasaun estraga ami nia toos no fatin hakiak animal. Ami, feto sira iha komunidade ne’e, deside katak agora tempu ona hodi hamriik hamutuk no muda situasaun att ne’e.” Bainhira nia toos hetan estragus no nia mos aumenta sai preokupada, liu-liu ba nia oan feto ne’ebé mak moris ho defisiénsia, Rosina hetan fali esperansa foun ida – no esperansa foun ne’e mak grupu rai-osan.
Dezde Rosina hola parte iha nia grupu rai-osan, nia aumenta nia fiar-an atu suporta nia familia, iha tempu hanesan, nia mos fiar-an atu kontinua ho hakiak animal sira. Grupu rai-osan ne’e, la’os de'it hanesan rekursu finanseiru ida, maibé hakbiit mos feto sira iha nia komunidade atu aloka osan hodi hametin sira nia preparasaun ba dezastre no mos responde ba dezastre sira.
“Ami nia grupu hetan fini modo husi projetu Disaster READY. Ami uza fini sira ne’e hodi kuda modo ba ami hodi han no mos fan iha merkadu lokal sira. Osan ne’ebé mak ami hetan ami rai fali iha kofre grupu nian. Hau empresta ona osan husi grupu hodi ajuda hau hakiak animal sira. Osan sira ne’e halo ami nia komunidade hakmatek, ida ne’e mos fasil los mai ami hodi hetan osan bainhira ami presiza.”
Atu proteje komunidade sira husi dezastre, ami nia parseiru lokal, BIFANO, servisu hamutuk ho ami. Sira introdus ona dalan ida oinsá komunidade sira satan bee uza material lokal sira hanesan au no fatuk; ita hanaran Bronjon. Ho fundus sira ne’ebé grupu ne’e rai hamutuk, sira uza hodi halo bronjon – tau fatuk ba au let ne’ebé mak forte hodi tahan bee bainhira tama ba tempu udan.
“Hau fiar-an atu dehan katak ami nia grupu prontu atu hasoru dezastre sira. Ami hetan treinamentu no pratika ona oinsá bele responde ba emerjensia sira, ami hatene ona saida mak atu halo. Bronjon sira ne’ebé ami tau iha fatin bee dalan sira proteje ona uma barak husi bee sa’e. Ami kuda modo no hakiak animal mos di’ak tebes, dalan ba ami hodi sustenta moris forte.”
Projetu Disaster READY avansa ona komunidade no parseiru lokal sira la’os de’it ba preparasaun no reziliensia ba dezastre, maibé haree mos ba rekuperasaun husi dezastre. Ho sistema no estrutura metin ona durante tinan lima implementasaun projetu ne’e, parseiru lokal sira suporta ona komunidade sira la’os de’it atu hasoru impaktu sira husi dezastre no mudansa klimatika, maibé ajuda mos sira ho ekipamentu ne’ebé sira presiza hodi rekupera no fila-fali ho moris babain bainhira dezastre mosu ona.
Projetu Disaster READY avansa ona komunidade no parseiru lokal sira la’os deit ba preparasaun no reziliensia ba dezastre, maibe haree mos ba rekuperasaun husi dezastre. Ho sistema no estrutura metin ona durante tinan lima implementasaun projetu ne’e, parseiru lokal sira suporta ona komunidade sira la’os deit atu hasoru impaktu sira husi dezastre no mudansa klimatika, maibe ajuda mos sira ho ekipamentu ne’ebé sira presiza hodi rekupera no fila-fali ho moris babain bainhira dezastre mosu ona.
