Projetu Disaster READY (Dezastre PRONTU) sai hanesan komponente xave ida ba programa Australian Humanitarian Partnerships (AHP), ne’ebé mak hetan fundus husi Governu Australia no implementa husi konsorsiu ida kompostu husi ONG Australianu lima ne’ebé mak lidera husi CARE, no servisu ho CAN DO (Caritas Australia), Oxfam iha Timor-Leste, PLAN International iha Timor-Leste no World Vision Timor-Leste, ho kolaborasaun hamutuk ho organizasaun nasional ba ema ho defisiénsia, Ra’es Hadomi Timor Oan (RHTO) no parseiru umanitariu sira seluk.
Konsorsiu ne’e servisu parseria besik ho Governu Timor-Leste no Sekretariu Estadu Protesaun Sivil, parseiru husi governu ne’ebé mak haree ba asuntu preparasaun, mitigasaun no responde ba dezastre.
Projetu Disaster READY servisu iha Viqueque atu estabelese no hametin preparasaun no responde ba dezastre ne’ebé sustentavel no inkluzivu husi komunidade ba nivel nasional. Objetivu jeral ba projetu ne’e mak atu asegura komunidade sira bele responde no rekupera di’ak liu husi dezastre ne’ebé mosu lalais no derepente no dezastre ne’ebé ho durasaun naruk. Ida ne’e sei atinje liu husi kria preparasaun ba dezastre, hasa’e koñesimentu no abilidade, hametin redusaun risku dezastre, hametin sistema avizu sedu no hadi’ak koordenasaun ho parseiru sira atu hasa’e igualdade jéneru no inkluzaun ba asuntu defisiénsia, redus violénsia bazeia ba jéneru no hametin protesaun labarik. Ho atividade servisu ne’e hotu, ami servisu no envolve governu lokal, sosiedade sivil no lider relijiozu sira.